مسرحية:صحتك بالدنيا
مسرحية من فصل واحد
المشهد الاول
دخل (ابراهيم) مستشفى وفى الخارج لافتة مكتوب عليها (مستشفى صحتك بالدنيا) حاملا
شقيقه (اسلام)المصاب فى حادثة سيارة متجها به مسرعا الى الاستقبال ووضع شقيقه على
اقرب مقعد وتوجه الى موظفة الاستقبال فوجدها تتحدث فى الهاتف مع صديقة لها فقال (ابراهيم)
لها:
-لو سمحتى فى حالة طارئة.
فاشارت موظفة الاستقبال له بالصمت وقالت لصديقتها على الهاتف:
-بقى الواد الواطى قالك امبارح نروح السينما طب قولتيله ايه؟....... علشان
خايبة كنتى تتقلى عليه شوية طب دخلتوا فيلم ايه؟
فقاطعها(ابراهيم) قائلا:
-يا ست الكل اخويا هيموت منى قبل ماتخلصلك حكاية الفيلم.
فقالت موظفة الاستقبال له:
-ايه يا استاذ مش شايف معايا تليفون مهم الدنيا ماطارتش وبعدين الاعمار بيد
الله خليك مؤمن يا اخى..
فقالت لصديقتها(فى الهاتف):
-وبعدين رحتوا على فين.....خلاص ماشى هاكلمك كمان شوية....
فانهت موظفة الاستقبال المكالمة والتفتت الى (ابراهيم)وسالته:
-عايز ايه يا استاذ ؟
- نص كيلو جبنة براميلى.
- انت هتهزر؟
- انا اللى بهزر؟! هو
ايه اللى عايز ايه اخويا سايح فى دمه جنبى وجايبه المستشفى هكون عايز ايه تذكرتين
بنوار شوفيلنا دكتور بسرعة.
- قبل مانستلمه او اشوفلك دكتور لازم تسيب2000جنيه رهن.
- رهن!!! هو انا جاى ااجر موتوسيكل؟
- والله هى دى اللوائح مش عاجبك تقدر تروح اى مستشفى تانية.
اخرج (ابراهيم)الاموال من جيبه واعطاها لموظفة الاستقبال التى اخذت تعد
الاموال ببطء فقال بصوت (ابراهيم) بصوت منخفض حتى لا تسمعه الموظفة:
-ده انتى وشك يمرض السليم حار ونار فيكم.
فقالت موظفة الاستقبال لطبيب يقف فى الجانب:
-زبون جديد يا دكتور.
جاء الطبيب ومعه 2تمارجيه فسال الطبيب موظفة الاستقبال:
-هو دفع الرهن؟
-ايوه.
فقال (ابراهيم) لنفسه فى دهشة:
-برده رهن!!!!
بينما يقوم الدكتور بفحص(اسلام)قال ل(ابراهيم):
-لازم نقل دم تكون فصيلة(O).
- بس انا فصيلة دمى(A).
- يا تشوف متبرع يا اما تشترى كيس دم(O) من المستشفى.
- اشترى.
- حلو هنضيف ثمن كيس الدم على الحساب وتتبرع يا بطل بلتر دم.
- ما انا بقول لحضرتك ان فصيلة دمى (A).
- ايوه ماهو انت بتدفع ثمن الكيس وبتتبرع بلتر من دمك علشان نعوض الكيس
اللى اخوك حياخده وبعدين صحة اخوك بالدنيا.
المشهد الثانى
فى عنبر المستشفى يرقد(اسلام) على السرير وبجانبه(ابراهيم)فقال الاول لاخيه:
-انا عايز اخرج من المستشفى ديه انا حاسس انها اللى هتموتنى.
فدخل فى العنبر رجل يبيع كشرى فى المستشفى يقول بصوت عالى:
-كشرى كشرى كل واتدلع قبل ماتودع.
واخر يبيع حاجة ساقعة وثالث يبيع سميط مناديا:
-سميط وبيض وجبنة.
فاتجه (ابراهيم) الى الممرضة وقال لها:
-ايه ده كشرى وحاجة ساقعة وسميط وبيض وجبنة فى المستشفى؟
-ايه يا استاذ خليها على الله ديه سبوبة خلى الناس تسترزق.
فاتجهت الى بائع الكشرى وقالت له:
-فيه عليك عشرين جنيه من امبارح غير ايجار انهاردة.
-عينيا يا جميل بس بافكر نزود السبوبة ونعمل مع الكشرى طواجن حلوة علشان
العيانين تشد حيلها .
-وماله.
فاخذ(ابراهيم) شقيقه للانصراف من المستشفى جاءت موظفة الاستقبال
وقالت له:
-انت يا استاذ دافع الفين جنيه رهن.
- اه ورجعت الازازة.
- ازازة ايه؟
- ازازة الحاجة الساقعة اللى عليها الرهن.
- احنا هنهرج يا استاذ كده اتبقى عليك الف جنيه.
- ليه؟
- 10رد سلام و10 جنيه
اجرة استماع لشكوى المريض.
- 10جنيه علشان تسمعوه عنده ايه؟
- طبعا علشان يفضفض،و80 جنيه استعجال علشان الحالة خطيرة،200 جنيه اجرة
الغرفة فى اليوم وهو قعد 5ايام.
- هى الاوضة المعفنة ديه ب200جنيه فى اليوم.
- يا استاذ صلى على النبى فى قلبك ديه فيها مروحة، وثمن كيس الدم200 جنيه
وانبوبة اكسجين 200 جنيه واجره الحمام ب100 جنيه فى اليوم.
- هو الحمام عليه اجرة؟
- اومال ايه ده كان بيدخل الحمام لوحده.
- ليه هو المفروض يدخل الحمام عزوة.
- 100جنيه للممرضات وفى مصنعية الدكتور200جنيه.
- مصنعية؟
- قصدى اجرة الدكتور ورسوم زياراتك 200جنيه و500 جنيه علشان عاش.
- نعم يا اختى هو الطبيعى انه يموت.
- يا استاذ مش المهم الفلوس صحتك بالدنيا.
تمت
ليست هناك تعليقات:
إرسال تعليق