اللهم انى صائم

اللهم انى صائم

اول ايام شهر الرحمة والغفران والصوم شهر رمضان، مع بداية الصيام امتلات المساجد فى صلاة الفجر بالمصلين باعداد كبيرة قد يتجاوز عددهم عدد المصليين فى يعض ايام الجمعة وان لن يستمر ذلك العدد فى صلاة الفجر حتى نهاية رمضان فغالبا ما يتناقص العدد حتى يصبح فى اخر ايام رمضان عدد المصليين فى المسجد فى الفجر طوال العام، وقبل المغرب بساعة فى اول الايام خرج عدد من الشباب والبنات للافطار فى المطاعم ومن ضمن هولاء كان (سليمان) الذى خرج برفقة اصدقائه يسيرون فى الشارع قبل الافطار بساعة متجهين الى احد المطاعم واثناء سيرهم شاهدوا (منى) التى خرجت للقاء صديقاتها وساروا خلفها بسبب ملابسها الملفتة فالتيشرت الابيض والبنطلون الضيق الذى ترتديه جذب انتباههم ليقول (سليمان) لاصدقائه:

-شايفين اللى انا شايفه حتى فى رمضان واحنا صايمين بيلبسوا كده.

وبدا فى معاكسة (منى) بألفاظ خادشة وعقب انتهائه من المعاكسة قال لاصدقائه:

-البنت مش مراعية الشهر الكريم اللهم انى صائم.

بينما قالت (منى) لنفسها عقب ان ابتعد عنها (سليمان) واصدقائه:

-شباب مفيش عندهم دم خالص بيعاكسوا حتى فى رمضان مفيش اى احترام للشهر الكريم اللهم انى صائمة.

ومن بعيد شاهد الحج (توفيق) كل ما حدث وما وصل الى منزله حتى قال لزوجته:

-مبقاش فيه احترام للشهر الكريم انهاردة بنت لابسة بقلة ادب واحترام هدوم مبينة جسمها كله ولا كأنه شهر صوم وواد صايع واصحابه بيعاكسوها من غير مراعاة للشهر الكريم يلا اللهم انى صائم.

فردت عليه زوجته:

-اخر زمن خلاص مبقاش فيه اخلاق.

وسرعان ما نقلت زوجته لجارتها بما شهده زوجها فى ذلك اليوم، وما ان استمعت شقيقتها لتلك القصة حتى دخلت الى منزلها لتكلم شقيقتها فى التليفون لتقص عليها ما حكته جارتها وما كانت شقيقتها الا والدة (منى) التى كانت ترتدى ملابس ملفتة وتمت معاكستها وما ان انتهت من مكالمة شقيقتها حتى بدات فى اعداد طعام الافطار بينما تساعدها ابنتها (منى) لتقول الام لابنتها فى اندهاش:

-الدنيا خلاص مبقاش فيها خير.

- ليه يا ماما؟

- اختى حكت ليا عن حاجة حصلت انهاردة وشافها جارهم (توفيق) وحكاها لمراته وهى حكتها لاختى.

- ايه؟

- عن بنت قليلة الادب اهلها مش محترمين ومعرفوش يربوها، البنت ماشية فى نهار اول يوم رمضان ولابسة هدوم ضيقة مش مراعية اداب الشهر وولد صايع بيعاكسها مش مراعى حرمة الشهر والناقص اللى اسمه (توفيق) جوز جارة اختى مش يحترم اداب الشهر لا راح يحكى عن الموضوع لمراته، اللهم انى صائمة.

فردت (منى) مؤيدة لامها:

عندك حق يا ماما مفيش احترام للشهر الكريم اللهم انى صائمة

تمت